كتب حسام الحاج الخميس، 22 يناير 2026 06:57 م حرص ناصر ماهر، لاعب الزمالك السابق والمنتقل حديثًا إلى نادي بيراميدز، على توديع جماهير القلعة البيضاء برسالة مؤثرة، عقب انتهاء مشواره مع الفريق، وكتب ناصر عبر حسابه على "إنستجرام":"مش عارف أبدأ منين، لأن في حاجات مش سهلة تتقال، خصوصًا لما تكون بتتكلم لجمهور عظيم زي جماهير الزمالك داخل القارة وخارجها، اسمحولي أعبّر عن حبي واحترامي ليكم.. والله مش مجرد كلام". ناصر ماهر يشكر جماهير نادي الزمالك وأضاف:""من أول يوم دخلت فيه النادي وأنا حاسس إن المكان ده فيه حاجة تتحب، يمكن عشان ده كيان كبير، أو لاعبين كبار وشخصيات محترمة بتتحمل أكتر من أي حد، أو عشان الجمهور المختلف بأجوائه ودعمه ومتعتُه، بس في الآخر الكورة ممكن تخليك تسيب مكان إنت بتحبه وده جزء من اللعبة، وأنا بحبكم جدًا والله". وتابع:""النهارده آخر يوم ليا في نادي الزمالك، النادي اللي تشرفت إني ألبس التيشيرت التاريخي بتاعه، ودافعت عنه بكل إخلاص وحب، إنتوا خلتوني نجم بجد، ودايمًا بقول إن ربنا أكرمني بجمهور الزمالك". ناصر ماهر: أتمنى أكون جزء من حل الأزمة المالية لنادي الزمالك وواصل:""يمكن الرحلة خلصت دلوقتي بسبب ظروف النادي الصعبة، وأتمنى أكون جزء ولو بسيط في حل الأزمة المالية، وأقدر أساعد النادي، لأن الزمالك كبير ويستحق إن الواحد يضحي عشانه، وبالنسبة لي الرحلة لسه فيها فصل تاني.. إمتى؟ الله أعلم". واختتم رسالته قائلًا:""بشكر كل زملائي اللاعبين الرجالة بجد في كل المواقف، وبشكر إدارة نادي الزمالك برئاسة الكابتن حسين لبيب، وبشكر جميع المدربين اللي اتدربت معاهم: شكرًا جون أدوار، شكرًا كابتن عبد الناصر محمد، شكرًا كابتن أحمد سليمان اللي خلاني أكون متواجد داخل نادي الزمالك، وكمان بشكر الأوفياء.. جمهور الزمالك العظيم الداعم الأول للنادي، آخر حاجة هقولها: أنا دخلت النادي وقلت أنا بحب الزمالك، ودلوقتي وأنا ماشي بقول هفضل أحب الزمالك".
