حل الشاعر أحمد المالكي ضيفاً على برنامج أكتر حاجة، الذي تقدمه خلود نادر على إذاعات راديو النيل، وتحدث عن مشواره الفني، وقال "أكتر حاجة بتسعدني إن الحياة تبقى هادية، ولما بتنزلي أغنية جديدة وتنجح"، مضيفاً :" أكتر عادة بقيت أعملها الفترة اللي فاتت إني بقيت بحب أنزل أجري قبل الفطار، وبقيت أروح الجيم".

وتابع الشاعر أحمد المالكي في تصريحاته قائلاً :"أكتر صفة بحبها في الناس الطيبة، ما بحبش الشخص المؤذي واللئيم، أكتر حاجة بتضايقني في الناس النفاق والبخل:، وأضاف :" أكتر حاجة نفسي أرجع أعيشها تاني فترة التسعينات وألاقي أبويا الله يرحمه، هروح هناك ما أرجعش، أكتر حاجة بتخليني أحب شغلي التقدير، وأكتر قرار أخدته وكنت مبسوط لما جيت أستقيل من البنك، خرجت وعليت الكاسيت على أغنية "أنا حر".

واستطرد قائلاً :"أكتر عادة رمضانية بحبها الشوية اللي قبل الفطار، ولحظة المغرب اللي كلنا بنحبها، أكتر ذكريات عمري ما هنساها أول مرة نزلت لي أغنية، وأول أغنية مع عمرو دياب، ويوم فرحي، ويوم ما سيبت البنك واتفرغت لإبداعي"، وعن موقف أثر فيه قال: "لما كنت لسه في البداية، بعت كلمتين لمحمد رحيم اتصل بيا كان بيقول فيا شعر"، واختتم تصريحاته قائلاً: "بحب فيلم "أسف على الإزعاج" أوي و فيلمي المفضل للزعيم "حتى لا يطير الدخان" ومن أفلام زمان فيلم "أمير الانتقام".