كتبت منال العيسوى

إفطار عزبة حمادة فى منطقة المطرية التابعة لمحافظة القاهرة، حدث ينتظرة الجميع منذ بداية اللشهر الكريم، أهالى المنطقة وضعوا دستور للمشاركة فى الإفطار، حتى تستمتع بيومك وتعيش جو مش هتلاقيه في أي حته في العالم غير في قلب حارة مصرية أصيلة بشبابها اللي زي الورد أهل عزبة حمادة بالمطرية 

خلال هذا التقرير نرصد ابرز بنود هذا الدستور وشروط المشاركة 

١. اعرف أن الشباب المنظمة للحدث بقالها يومين مانمتش اوفيه شباب من 3 أيام مناموش عشان يفرحوك، فخليك ضيف خفيف، واسمع كلام المنظمين بالحرف لأن أعصابهم مشدودة من ضغط الشغل.

2- شوارع منطقة عزبة حمادة  مفتوحه للجميع ، هتلاقي هناك ضحكة صافية وزينة في كل شبر، ورسومات ترجعك لرمضان بتاع زمان وحلاوته، فاستمع لكلام الشباب وتوجيهاتهم تفاديا للزحام 

3- اركن سيارتك بعيدا عن منطقة الحدث ويمكنك الوصول هناك بمواصلات عادية حتى لا تتسبب فى زحام بالمنطقة، لأن الركنة هناك صعبة، أو المترو هيوصلك لمحطة الحلمية ومنها 10 دقائق مشي، أو أي ميكروباص لميدان المطرية هيقوم بالواجب..

4- لو عايز تروق وتصور لقطات حلوة، انزل قبل العصر، بعد العصر الدنيا بتتقلب زحمة وحرفيا مفيش فيها مكان لرجل، والشوارع بتتقفل من كتر الناس.

5- لا تاخذ "ست الكل"  معاك ويمكنك تركها في البيت، لان نظرا لتوافد الناس على المكان يكون زحمة قبل الفطار هناك صعبة جداً، روح أنت عيش المغامرة وانقلهم الأجواء.

6- ستجد فى المكان سيدات وبنات من أهالى المنطقة تعبوا مع شبابها ورجالتها فى تجهيز الموائد والطهى ، فكن ضيف خفيف لا ينظر لأهل البيت المضيف ، فالأصول مفيهاش هزار، أهل المطرية "ولاد بلد" وجدعان فوق ما تتخيل، بس في الأصول مبيعرفوش يطبطبوا، خليك جدع وراعي حدودك عشان تفضل صورتك حلوة وسطهم.

جدير بالذكر أن الفكرة في افطار المطرية هي الروح واللمة مش الأكل، لو عايز رأيي، روح بدري اتصور وعيش الأجواء، وافطر في أي مطعم قريب، لأن الزحمة فوق الوصف، رغم توفير 100 ألف وجبة.