كتب ـ محمد عبد العظيم

قال الرئيس عبد الفتاح السيسي، خلال كلمته في افتتاح فعاليات مؤتمر ومعرض مصر الدولى للطاقة : "هخلي التعقيب على مرحلتين.. المرحلة الأولي الخاصة باللى إحنا بنعمله في مصر.. وبقول لكل الشركات التي تعمل في مصر في مجالات الطاقة والاستكشاف وأشكركم على دوركم الإيجابي وأيضا تحملكم في ظروف شديدة الصعوبة مرت على العالم ومصر خلال الخمس سنوات الماضية.. أزمة كورونا والحرب الروسية وحرب غزة والآن الحرب اللي في الخليج النهاردة ودي قد تكون أكثرها تأثيراً على المنطقة ويمكن العالم كله.

وأضاف الرئيس السيسي: "هنا هتكلم على نقطة مهمة جداً جداً إن في قطاع الطاقة، وإنتوا كلكوا تعرفوا ده كويس، إن أي توقف أو تجميد للنشاط بيبقى ليه تأثير كبير جداً بعد كده، لأن العمل في هذا المجال بيحتاج سنوات طويلة جداً من البحث ومن الدراسات، ثم بعد كده حتى لما بيبقى في إنتاج أو بيبقى في حقول جاهزة إنها تخش الخدمة بتحتاج أيضاً لسنوات، أو لفترة زمنية عشان تدخل الإنتاج الفعلي وتبقى متاحة للأسواق".

وتابع الرئيس السيسي: "مش هنسى أبداً إن أنا أشكر الرئيس نيكوس على أيضاً إن التعاون اللي فيما بيننا في مجال الطاقة.. ودخول حقول مهمة جداً جداً للإنتاج، وعن طريق التسهيلات اللي موجودة عندنا فى دمياط حتى تدخل السوق العالمي في أسرع وقت ممكن.. وده أمر أيضاً أنا بشكر فخامة الرئيس القبرصي على تعاونه معانا فيه". 

وأكمل الرئيس السيسي: "وبأكد له إن إحنا شركاء في هذا الأمر، مش بس في العلاقات القوية والاستراتيجية بين البلدين، ولكن في كل المجالات اللي بنتكلم فيها بما فيها الطاقة، اللي بتبين أو اللي بيتضح لينا كل شوية مدى الأهمية الكبيرة جداً لهذا التعاون بينا وبين بعضنا وبين الدول في المتوسط وأيضاً مع الاتحاد الأوروبي فيما يخص الطاقة، وأهمية تجاوز الأزمة اللي إحنا بنعاني منها دلوقتي.. إذن شكراً لشركائنا على الحضور، شكراً لشركائنا.. أو شكر للحضور كله بالكامل، ومهم جداً إن إحنا نتناقش بشفافية وبعمق شديد جداً فيما يحدث الآن وتداعياته على الاقتصاد العالمي بالكامل".