أكدت الفنانة عفاف مصطفى، أنها استمتعت كثيرًا بالمشاركة في فيلم "الكلام على إيه"، مشيدة بحالة التعاون الكبيرة التي جمعت فريق العمل، خاصة بين جيل الشباب من الفنانين.

وقالت عفاف مصطفى، في تصريحات لليوم السابع، : "بصراحة أنا مبسوطة جدًا بالشغل مع الجيل الحالي، لأن نجوم دلوقتي دمهم خفيف وبيحبوا يساندوا بعض، وكل واحد بيفرح لما زميله يقول إفيه حلو أو يعمل مشهد ناجح، ومفيش حالة الغيرة اللي كانت موجودة زمان بالشكل ده، بالعكس في روح حلوة جدا وتعاون واضح بين الكل".

وأضافت: "نجوم دلوقتي مترابطين أكتر، وده بان جدًا في كواليس فيلم "الكلام على إيه"، الكل كان حابب يطلع أحسن حاجة، وده انعكس على التصوير والأجواء كلها".

وتحدثت عن مخرج العمل قائلة: "المخرج عنده رؤية واضحة جدًا، وأنا بطبعي جدًا بحترم رؤية المخرج وقراراته لأنها في النهاية بتصب في مصلحة العمل".

تدور أحداث فيلم "الكلام على إيه" في إطار اجتماعي كوميدي والذي يتناول حكاية أربع أزواج من أعمار وطبقات مختلفة في ليلتهم الأولى كأزواج، حيث يواجه كل زوجين تحديا من نوع مختلف في الظروف المحيطة بهم، مما يوقعهم في مفارقات كوميدية تكاد تنهي الليلة الأولى لكل منهم بنهاية سيئة.

فيلم الكلام على ايه من بطولة، مصطفى غريب، أحمد حاتم، حاتم صلاح، سيد رجب، خالد كمال، دنيا سامي، آية سماحة، جيهان الشماشرجي، انتصار، ودنيا ماهر، في توليفة فنية تجمع بين أجيال مختلفة من النجوم، وتوازن بين الكوميديا الشبابية والخبرة التمثيلية، والفيلم من إخراج ساندرو كنعان، وتأليف أحمد بدوي.