هو رأس الحكمة بدأت تتبني بجد ولا لسه كلام؟، وإيه حكاية عقد الـ10 مليارات جنيه؟، ويعني إيه “وادي يم” وليه هو أول حي يتنفذ؟، ومين اللي بينفذ المشروع؟ وليه شركات عالمية داخلة فيه؟، والـ35 مليار دولار هيروحوا فين بالظبط؟، وهل رأس الحكمة هتبقى مدينة سياحية بس ولا مدينة متكاملة؟ من ساعة الإعلان عن صفقة رأس الحكمة، ناس كتير كانت بتسأل: إمتى هنشوف التنفيذ الحقيقي على الأرض؟.. الحقيقة أن اللحظة دي بدأت بالفعل. مجموعة “مدن القابضة” الإماراتية بدأت أولى مراحل الإنشاءات داخل المشروع، بعد ما أسندت عقد جديد بقيمة حوالي 10 مليارات جنيه لتحالف من شركتين كبار، علشان يبدأ تنفيذ البنية التحتية لأول حي في المدينة، وهو حي “وادي يم”. وده مش أول عقد في المشروع، لأن قبل كده كان فيه عقد تاني مع أوراسكوم للإنشاءات بحوالي 15 مليار جنيه، وده معناه أن المشروع خرج رسميًا من مرحلة التخطيط ودخل مرحلة التنفيذ الفعلي. طيب ليه “وادي يم” مهم؟.. لأنه أول حي هيظهر على أرض الواقع، وهيكون واجهة رأس الحكمة قدام المستثمرين والسياح، كمان الحي هيضم شواطئ، وفنادق عالمية، ووحدات سكنية، ومارينا، ومناطق ترفيهية، وجولف، وبوليفارد تجاري، يعني مدينة متكاملة مش مجرد منتجع سياحي. رأس الحكمة أصلًا انطلقت باستثمارات ضخمة بتوصل لـ35 مليار دولار، وبتعتبر واحدة من أكبر الصفقات الاستثمارية المباشرة في تاريخ مصر، والمرحلة الأولى لوحدها هتتطور على مساحة 50 مليون متر مربع، وبعدها هيتم استكمال باقي المشروع بالتعاون مع مطورين من مصر والإمارات وشركات عالمية. أهمية المشروع مش في حجمه بس، لكن في تأثيره كمان، لأن كل عقد جديد معناه شركات شغالة، ومقاولين، ومهندسين، وآلاف فرص العمل، وحركة اقتصادية كبيرة في الساحل الشمالي، وكمان وجود مشروع بالحجم ده بيدي رسالة قوية أن المنطقة بقت جاذبة للاستثمار العالمي. من الآخر، رأس الحكمة ما بقتش مجرد فكرة أو مخطط على الورق، لكنها دخلت مرحلة التنفيذ الحقيقي، وكل عقد جديد بيقرب المشروع خطوة من أنه يتحول لواحدة من أكبر المدن السياحية والاستثمارية في منطقة البحر المتوسط. المصدر: بانكير
