‫وجه الإعلامي أحمد شوبير رسالة بعد وداع منتخب مصر للمونديال بمؤامرة تحكيمية للحكم الفرنسي في لقاء الأرجنتين بثمن نهائي المونديال. ‬

‫وكتب شوبير عبر حسابه بموقع التواصل الاجتماعي إكس: ‬‫أكيد سعيد وفرحان بكل ردود الأفعال والاحترام الكبير لمنتخب مصر وأكيد حزين جدا لخروجنا بفعل فاعل فاسد من المونديال ولكن دلوقتي هكتب مشاعر أب شاف ابنه وهو بيعافر وبيحارب وبيموت نفسه من سنين وبيواجه عقبات واتهامات علي مدى سنوات لو كنت أنا مكانه كنت رميت الفوطه من زمان وقلت بلاها كوره من الأصل ولكني كل يوم كنت بشوفه وهو بيصمم علي تحقيق حلمه انه يلعب كأس عالم وكل فتره يقولي هشرفك وأرفع راسك ويقولي صدقني أنا مش بقول كلام وخلاص وبكره تشوف وطبعا كنت باشجعه لكن للامانه مكنتش مصدقه.

وتابع: لكن هو كان مصدق نفسه وكان ومازال وراه أم بمعني الكلمه صدقت حلمه لحد مابقي حلمها هي وحاربنا كلنا عشان نحقق حلمه لكن هو كان اكترنا ثقه تركيز واصرار والتزام واحترام عايش حياه صعبه احتراف بمعني الكلمه الأكل والنوم والتدريب الفردي بعيدا عن الفريق بمواعيد منضبطه مبيسبش حاحه للصدفه أبداً شغال بمبدأ إرضي ربك واعمل اللي عليك واحترم مهنتك وسيب الباقي علي الله عامل اللي عليه بما يرضي الله ومستنى المكافأه من المولي عز وجل لا بيسأل علي عقد ولا فلوس فقط ولا غير واحد عنده حلم ومصدقه وواثق انا ربنا هيحققه وكل يوم يقولي حتعمل إيه وانت شايفنى بلعب كأس عالم وربنا بيكرمني أنا والفريق كله للأمانه مكنتش بعرف أقوله إيه وكنت بخاف عليه إن الحلم ميتحققش لحد ما جه كأس العالم والحلم بقي حقيقه وكمان لقيته بيتألق وربنا بيكرمه ويوفقه وكل ما أكلمه وأقوله هايل يابطل يقولي لسه معملناش حاجه بس انتوا ادعولي أقوله هطلع اتكلم عليك النهارده في البرنامج يقولي لا اتكلم على الفريق وإدي للناس حقها انا لا!! اقوله يابنى لازم تاخد حقك يقولي اسمع كلامى وطبعا باسمع كلامه لأني محبش ازعله ولا أزعل حد من ولادي ابدا لأنكم متعرفوش قد إيه ولادي هما نقطة ضعفي.

وأردف : المهم كبر الحلم وصدقناه وكلمته قبل ماتش الارجنتين وسألته في أمل؟؟؟ رد قاللي طبعا وحنكسب إن شاء الله وطبعا اتمنيت له التوفيق وطبعا أمه كانت قاعده حنبي مش بتبطل دعاء ولا صلاه على أمل انه يحقق حلمه هو ومنتخبنا.

شوبير يطالب مصطفى بالصبر لتحقيق حلمه 

وأختتم: لحد ماجات المباراه وحسيت إن الأمل بيقرب ويقرب ويقرب ولكن فجأه اتسرق الحلم بفعل فاعل فاسد وخرجنا من كأس العالم بمؤامره شهد بيها كل العالم خرجنا نعم من كاس العالم ولكن دخلنا التاريخ من أوسع أبوابه واجبرنا الجميع على احترامنا وهفضل مستنى لحد مايحقق حلمه وأمله حتى لو كنت مش من أهل الدنيا لكن أكيد هكون حاسس بيه وفرحان ليه … أوعى تزعل يا أوفا يا حبيبي انت وكل نجومنا كفيتوا ووفيتوا ومعلش بقي يابنى هتتعب 4 سنين تانى بس في الآخر والله هتحقق كل اللي نفسك فيه لإنى عارف إصرارك كويس ومتأكد إنك هتوصل لهدفك يامصطفي يامصطفي أنا بحبك يامصطفي عشان خاطرى أوعى تزعل أبدا.