صورة لسيدات مصر ….
اللي في الصوره دول سيدات مصر من جيل امهاتنا و جداتنا ..
دول اللي ربونا و علمونا و هذبونا…
دول اللي علمونا نتكلم ازاي و نقول “من فضلك “و “حضرتك ” و لو سمحت..
اللي علمونا نقول متأسف لو غلط..
اللي علمونا نقف للكبير …
دول اللي كانوا بيودونا النادي يوم الجمعه و يقعدوا قدامنا يحرسونا و يلاحظونا و احنا بنلعب..
دول اللي قعدوا جنبنا و احنا بناكل و فهمونا ازاي نمسك الشوكه و السكينه ..
و عيب تتكلم و الاكل في بقك..
و اقفل بقك و انت بتمضغ الاكل..
دول اللي رفضوا مضغ اللبان في الشارع ..
وازدروا الجلوس علي القهاوي ..
و متعملش صوت و انت بتشرب الميه..
و امسح بقك بالفوطه من غير ما تكرمشها و تكعببها..
دول اللي فهمونا عيب ترمي حاجه في الشارع ..
دول اللي قالوا لنا ان ده شارعنا .. مش شارع الحكومة..
دول اللي وصلونا لباب الجامع والكنيسة ..
دول اللي حفظونا : قم للمعلم وفًه التبجيلا …
قالولنا عيب تتكلم في التليفون من الساعة ٢،٣٠ للساعة ٥ لانها وقت راحة..
ومايصحش تطلب حد بعد الساعة ١٠ بالليل..
علمونا نضرب جرس واحد ، ونقف بعيد ..
علمونا نقول نعم او افندم وان ” ايه “دي عيب !!
عاقبونا لو قلنا : نيلة !!
وحرمونا من الخروج لو سمعوا “يا خرابي”!!!
عرفونا ان الأناقة ليست ابتذال،
وأن الشياكة ليست فجور!!
علمونا كيف نلبس من محلين تلاتة …
وكيف نسعد بخروجة في الاسبوع …
علمونا الرضا والقناعة …
وأن التهور غير الشجاعة ..
عرفونا العيب …. وسابونا نعرف الحرام
جابوا كتب وروايات … ومصحف وانجيل!!
خافوا ربنا… فخوفنا معاهم….
وفهموا دينهم.. ووروهلنا في تصرفاتهم…
قدروا الجمال والذوق …..
فتمعتنا ببلد جميل راقي !!
رفضوا القبح بكل صوره….
فأبينا سماعه ورؤيته ….
علمونا ان لا نتدخل في خصوصيات …
لا في حياة ولا منازل ولا أديان الناس …
علمونا المجاملات بالقول والفعل والبسمة عند اللقاء…
زرعوا فينا الطيبة والخير والتبرع “لمعونة الشتاء ”
أحبوا الزهور ، وزرعوها…
وأشتروها ليعطروا السيارات والمعاصم والصدور…
دول اللي حببونا في الست وفيروز ..
والشيخ رفعت والنقشبندي ،
وبعتونا بطبق الكحك لجيراننا يوم ٧ يناير !!
دول ستات مصر اللي كانول بيذاكروا لنا ، و مفيش دروس خصوصي و لا سنتر تعليمي و لا دياولو..
دول اللي كانوا بيدبروا مصاريف البيت و المدارس و الهدوم و المصيف..
دول اللي في زمن الرخص رفضوا البذخ ….
وفي زمن صعوبة التواصل، كانوا حريصين علي تواصلنا بأهلنا ….
دول اللي كانوا بيطبخوا اطعم اكل رغم مكنش في غير صنف نوع سمن واحد بس ..
و هو يادوب زيت التموين ..
و لا كان في سوبر ماركت و لا كارفور و لا جورميه..
دول ..
ستات مصر..
بس خلاص ..
مفيش كلام تاني يتقال..
سيدات مصر اللي ربوا هذا الجيل ..
وانا أدين لهم بالكثير …..
ومصر راح منها كتير قوي لما راحت ستات مصر الفُضليات !!!
تحياتي سيداتي … حكيم عيون !!
ملحوظة: مضمون هذا الخبر تم كتابته بواسطة البشاير ولا يعبر عن وجهة نظر مصر اليوم وانما تم نقله بمحتواه كما هو من البشاير ونحن غير مسئولين عن محتوى الخبر والعهدة علي المصدر السابق ذكرة.
