تحدثت الفنانة منة تيسير عن الدور الذي قامت بتجسيده خلال أحداث مسلسل "العتاولة"، الذي تم عرضه ضمن موسم دراما رمضان المنقضي 2024، وعن علاقتها بفناني العمل.
وكشفت منة تيسير في تصريحات خاصة لموقع "الطريق" عن كواليس تعاونها مع أبطال العمل.
وقالت منة تيسير: "الدور اللي بعمله في العتاولة مختلف عن أي دور أنا عملته، وخرجت من أدوار البنوتة الصغيرة وإني دلوقتي بقيت بعمل دور أم لطفل عنده 7 سنين ودا في حد ذاته حاجة مختلفة، والدور عامة مختلف ومؤثر جدا، وكله حاجات إنسانية وفيه انفعالات كتير، ونوعية الأدور اللي بيبقى فيها إنسانيات بحبها، بتبقى فعل مش رد فعل، ويسرا طول الوقت فعل، ودي حاجة شدتني".
وتابعت: "طبعا عمل كبير وفيه نجوم كبار، وعمل مهم مع مخرج كبير وشركة كبيرة، فأكيد أحب أكون جزء منه، ودوري أنا حباه كدا، فأكيد دي حاجة أسعدتني، ومخوفاني ومخلياني مركزة أكتر".
منة تيسير: « بحب أحمد السقا جدا وفيه علاقة عائلية من وأنا طفلة صغيرة»
وأضافت «منة» في تصريحات خاصة لـ«الطريق»: «أنا اشتغلت قبل كده مع الأستاذ أحمد السقا والأستاذ طارق لطفي والأستاذ باسم سمرة والأستاذة مي كساب، وبحبهم جدا، وطبعا أنا كنت اشتغلت مع أحمد السقا في مسلسل ذهاب وعودة، وأنا بحبه جدا، وفيه علاقة عائلية من وأنا طفلة صغيرة فأنا بحس بالطمأنينة معاه، أنا بحس معايا أخويا الكبير في التصوير».
وتابعت: «وجود أستاذ أحمد السقا ومي كساب بيريحني، لأن مي برضو صاحبتي من زمان واشتغلنا مع بعض كتير، وأنا وهي بنحب بعض جدا، وأنا أغلب دوري أنا ومي مع بعض طول الوقت، ودا طبعا مخاليني حاسة براحة نفسية وحاسة إنها مرايتي ودا حقيقي، عارفة لو فيه شعراية جاية على عيني بتعدلهالي، ومستمتعة معاها جدا».
منة تيسير: «بحب اشتغل مع باسم سمرة.. تمثيله خطير وأنا من الفانز بتوعه»
واستكملت: «بالنسبة لأستاذ باسم سمرة أنا عملت معاه كذا عمل قبل كدا، وبحب اشتغل معاه جدا وأنا وهو عملنا مع بعض أعمال نجحت قبل كدا، عملنا مع بعض فيلم الغابة وصرخة أنثى، فأنا بحبه، وأنا من الفانز بتوعه، وهو في التمثيل خطير ومرعب وبيدخلك الحدوتة جوة العتاولة".
وأردفت: "وأستاذ طارق لطفي طبعا اشتغلت معاه قبل كدا، وسعيدة إني بشتغل معاه تاني، وأنا للأسف معنديش شغل معاه جوه المسلسل، وطبعا أستاذ أحمد خالد موسى تاني مرة اشتغل معاه وسعيدة جدا أنه جابني لتاني مرة، ومبسوطة إنه جابني في دور مختلف عني ودي حاجة أسعدتني جدا، وطبعا شركة أستاذ صادق الصباح اشتغلت فيها أكتر من مرة، والشركة بتحب تعمل أعمال كبيرة ومهمة، وبيفرق معاه إنها تعمل عمل محترم ويسيب أسر في الصناعة».
أحداث مسلسل العتاولة
تدور أحداث المسلسل في مدينة الإسكندرية، والتي يتميز أهلها بأنهم أصحاب طباعًا خاصة وأسلوبًا في الكلام ولهجة مميزة، ويجسد النجم أحمد السقا شخصية نصار هو نموذج لبطل تراجيدي، يعيش صعودًا وهبوطًا في حياته، لكنه يحاول أن يحافظ على الإيجابية في كافة الظروف وفي جميع تعاملاته، في وقت تدفعه ظروف الحياة إلى السلبية، ثم تحدث متغيرات في حياته.
أبطال مسلسل العتاولة
يذكر أن مسلسل «العتاولة» من بطولة النجوم: أحمد السقا، طارق لطفي، زينة، باسم سمرة، مي كساب، أحمد كشك، هدى الإتربي، نهى عابدين، ميمي جمال، زينب العبد، منة تيسير، مصطفى أبو سريع، مريم الجندي، مؤمن نور، محمد التاجي، يسرا الجديدى، وآخرون، وهو من تأليف هشام هلال، وإخراج أحمد خالد موسى.
اقرأ أيضا: بعد معاناتها مع التمثيل.. منة تيسير: أنا زهقت من الشغلانة
ملحوظة: مضمون هذا الخبر تم كتابته بواسطة الطريق ولا يعبر عن وجهة نظر مصر اليوم وانما تم نقله بمحتواه كما هو من الطريق ونحن غير مسئولين عن محتوى الخبر والعهدة علي المصدر السابق ذكرة.
