الفنانه مريم فخر الدين..بتقول ..-ايام ماما مكنتش سامعة الا أوبرا ، ماما كانت متعودة في بلدها على أوبرا توسكا ، مدام بترفلاي .. انا النهاردة لما أسمع منهم أقولك دي حتة من مدام بتر فلاي ، دي حتة من أوبرا عايدة ، فاهماهم .. لما جيت اشتغلت في أفلام الأغاني بتاعة فريد الأطرش مكنتش حاباها لان ودني متعودة على الأوبرا ، أم كلثوم بقى عشان تخليني أحب أغانيها كانت كل ما تغني تبعتلي تذكرة بنوار وتحكم عليا تبقى قاعدة في وشي كده فأسمعها غصبا عن عين أمي ما انا لازم أروح هعمل ايه .. في الاخر انا حبيت أم كلثوم
=التقيتي بأم كلثوم ؟
-اه طبعا ، كتير في مصر ولبنان وكانت تجيبني عشان قلتلها ان ماما معوداني على أوبرا
=كان فيه صداقة بينكم ؟
-لأ مقدرش أقولك صداقة انما هي كانت ست عندية جدا لما تعرف ان فيه نَفَس مش حاببها تحكم عليه بالإعدام ، لازم تجيبه وتفضل تغنيله ، شوفي أم كلثوم بتكرر الكوبليه كتير جدا عشان الناس تفهم الكلام وتتعود عليها وتحفظها تقوم تحبها ده نظام أم كلثوم .. فأنا بقى كانت كل حفلة تجيبني أبقى متضايقة وبعدين في الاخر انا حبيتها
مريم فخر الدين عن الست
ملحوظة: مضمون هذا الخبر تم كتابته بواسطة البشاير ولا يعبر عن وجهة نظر مصر اليوم وانما تم نقله بمحتواه كما هو من البشاير ونحن غير مسئولين عن محتوى الخبر والعهدة علي المصدر السابق ذكرة.
