كشف المؤلف والمنتج ريمون مقار أن صناع عمل مسلسل أولاد الراعي وافقوا على العمل على الفور بمجرد عرضه عليهم، فالترشيحات الأولية للنجوم هي ما ظهرت في النهاية على الشاشة، موضحا: "في مشاريع في البداية لما بترشحي نجم، النجم ده بيبقى عنده وجهة نظر أو يقول الدور مش مقاسي".

وتابع لـ "اليوم السابع": "ولكن الغريب في أولاد الراعي، إن كل الأبطال اللي قلناهم على الورق من اليوم الأول، هم اللي عملوا العمل، الشخصية الوحيدة اللي رحنا وجينا فيها هي شخصية حبيبة (أمل بشوشة)، الباقي الغريب إن كل الأسامي اللي اتقالت وافقوا فوراً".

وعن صراع رجال الأعمال والدخول في نفوسهم أكثر من صراع المال، أشار ريمون مقار: "النقاش في عالم البيزنس دايماً لما بيتعمل بيبقى الاختلاف على المال، ولكن هنا الاختلاف كان على ما وراء ذلك، أنا عايز أشوف الناس دي من جواهم وعلاقاتهم ببعض إيه، إحنا ما كانش عندنا اختلاف في المال خالص، آخر حاجة كنا بنفكر فيها الورث والمال، إحنا بنفكر في حاجات أهم وهي الأسرة، الدفء العائلي اللي بيفتقده دلوقتي كتير من الأسر العربية".

كما أضاف: "رسالة المسلسل الحقيقية اتقالت في كلمات الأغنية (التتر) اللي اتكتبت، لما جه الأستاذ أيمن بهجت قمر وقابلني وشرحت له المسلسل.. كتب باختصار المسلسل، في التتر".

مسلسل أولاد الراعي بطولة ماجد المصرى، خالد الصاوى، أحمد عيد، نرمين الفقى، أمل بوشوشة، إيهاب فهمى، نوران ماجد، إيناس كامل، فادية عبد الغنى، محمد عز، نوليا مصطفي، شادى مقار، غادة طلعت، كريم عبد الخالق، وآخرين، وهو من تأليف ريمون مقار، مينا بباوي، وخالد شكري، ومحمود شكري، وطه زغلول، إخراج محمود كامل، وإنتاج شركة فنون مصر.