تحدث النجم باسم سمرة عن كواليس موافقته على دور "زكي" في مسلسل عين سحرية، الذي عرض في النصف الأول من رمضان 2026، محققا نجاحا كبيرا وإشادات واسعة من الجمهور.

وقال باسم سمرة خلال ندوته باليوم السابع: "أنا كنت محطوط في مأزق جامد قوي السنة دي لأن أنا بقالي سنتين كنت بعمل مسلسل الحمد لله كان ناجح، (العتاولة)، وعلى المستوى الجماهيري وحتى في الوطن العربي كنت سافرت فالناس متفاعلة معاه جداً والكاركتر بتاع عيسى الوزان كان مسمع و(يلا بينا) وكده".

وتابع: "وكان التحدي إن أنا أدور على الدور المختلف، فاتفاجئت إن في حوالي 4-5 أعمال من الوزن التقيل زي ما بيقولوا مع نجوم أنا بحبهم وبحترمهم جداً، بس هي عبارة عن عيسى الوزان باسم مختلف، الراجل الشرير أبو دم خفيف، سميه محسن بقى سميه مدحت أي حاجة.. وده وترني جداً لدرجة إن أنا كنت على وشك إن أنا أقول أريح السنة دي، لغاية ما ظهر الدور بتاع (عين سحرية) ودور (ذكي) من خلال محمد مشيش والسدير مسعود، مخرج جميل قوي أنا بحبه وسبق اشتغلت معاه في مسلسل تاني اسمه (منعطف خطر) وحققنا نجاح جامد وهو كان بيتعرض على منصات".

كما أشار: "فطبعاً اتحمست جداً رحت وبعدين عرفت الدور وفرحت قوي إن فيه عصام عمر، إحنا محتاجين دم جديد ومحتاجين أداء مختلف وحد ماشي مع الأحداث الحالية بالشباب بحبهم للناس وكرههم للي بيحصل فعصام بيجسد ده، وفي برضه عمر الشريف اللي كان عامل أخوه، اللي هو الجيل الأقل، الولد ده رائع أنا بتنبأله بمستقبل جميل حبيته قوي".

يأتي مسلسل عين سحرية في إطار اجتماعي تشويقي، حول شاب بسيط يعمل فني تركيب كاميرات مراقبة، يتورط في جريمة قتل، قبل أن يقتحم حياته محام غامض، لتتحول العلاقة بينهما إلى ثنائي يكشف ملفات فساد كبرى.

مسلسل عين سحرية بطولة عصام عمر، باسم سمرة، عمرو عبد الجليل، سما إبراهيم، جنا الأشقر، وغيرهم من الفنانين، والعمل من تأليف هشام هلال وإخراج السدير مسعود، وإنتاج المتحدة ستوديوز بالتعاون مع المنتج محمد مشيش.

باسم سمرة

ندوة باسم سمرة

باسم سمرة