كتب أحمد عبد الرحمن

ابتكر الطالب كريم عماد، الطالب بكلية الحاسبات والمعلومات، تطبيقًا خدميًا يستهدف خدمة أهالي قريته أولاد يحيى التابعة لمركز دار السلام بمحافظة سوهاج، في خطوة تعكس دور الشباب في توظيف التكنولوجيا لخدمة المجتمع المحلي.

وفي تصريحات خاصة لـ"اليوم السابع"، قال كريم: "الفكرة جاتلي من معاناة شخصية، كنت ببقى محتاج أركب مواصلات ومبلقاش عربيات، خاصة إني أنا وصحابي بندرس في جامعة العريش ومبنعرفش سواقين، ففكرت نجمع السواقين في برنامج واحد باسم القرية بحيث كل الناس تستفيد وتعرف مواعيد المواصلات."

تطوير الفكرة لتشمل الخدمات الطبية
وأوضح أنه لم يتوقف عند فكرة المواصلات فقط، بل بدأ في توسيع نطاق التطبيق ليشمل خدمات أخرى يحتاجها أهالي القرية، مضيفًا: "بدأت أكبر الفكرة واشتغلت عليها، ودرست البلد محتاجة إيه من خدمات، فجت في بالي الأطباء والصيدليات، لأن في ناس بتتعب بالليل ومبتعرفش توصل للدكاترة، فعملت قائمة بالأطباء والصيدليات."

إضافة الحرفيين لدعم سوق العمل المحلي
وأشار كريم إلى أن التطبيق تطور ليشمل فئات أخرى من مقدمي الخدمات، خاصة الحرفيين والعمال، قائلاً: "الفكرة كبرت كل يوم أكتر، وضفت كمان الحرف والمهن، لأن في عمال كتير مش لاقية شغل، وفي ناس بتدور عليهم ومش عارفة توصلهم، فجمعنا الأرقام وبكده الكل بقى بيساعد بعضه."

نموذج شبابي للتنمية المجتمعية
وأكد الطالب أن هدفه الأساسي هو خدمة أهالي قريته وتسهيل حياتهم اليومية، مختتمًا: "بكده قدرت أساعد أهل القرية بالكامل، والتطبيق بقى وسيلة تربط كل الناس ببعض."
ويُعد هذا التطبيق نموذجًا مميزًا لمبادرات الشباب في دعم التحول الرقمي داخل القرى، وتعزيز التكافل المجتمعي من خلال حلول تقنية بسيطة وفعالة.