تحدث الموسيقار والمؤلف الموسيقى خالد الكمار عن كواليس العمل على موسيقى مسلسل عين سحرية، الذي يجمعه بالمخرج السدير مسعود للمرة الثانية، مشيرا إلى أنه وافق على المسلسل على الفور بمجرد تحدثهما.

وقال خالد الكمار لـ اليوم السابع: مخرج مسلسل عين سحرية السدير مسعود كلمني وقالي عايزك معايا في رمضان، وكنت اشتغلت معاه قبل كدا مسلسل لباسل خياط، وكان عمل في منتهى الجمال يعني، فمن قبل ما أعرف أي تفاصيل قلت له يلا أنا معاك.

وتابع: وبعدين بعتوا لي السيناريو، قريت أول خمس ست حلقات كدة ما كنتش لسه أعرف مين الأبطال ولا أي حاجة، بس السيناريو شدني جدًا وحسيته عالم مميز ومش شبه المسلسلات المعتادة خالص، فتحمست جدًا أكتر، وبعدين لما قالوا لي بقى كمان إن هو عصام عمر وباسم سمرة حسيت إن هو يعني يا نهار أبيض يوم الهنا، بناءً عليه ابتدينا بقى العملية الطبيعية، ابتديت أقول للمخرج حبة أفكار في دماغي، وهو كان عنده توجيه معين ومحدد أوي في دماغه، إنه عايز المزيكا تبقى فيها من روح الأفلام بتاعة أمريكا الجنوبية تحديدًا، وعشان كده حتى هو اقترح عليا استخدام آلة معينة من بوليفيا، هي دي الآلة اللي في الآخر بقت هي الصوت الأيقوني للمسلسل، أو هي الصوت اللي الناس رابطاه بالمسلسل جدًا لأن ما أظنش إن هي استُخدمت في أي مسلسل مصري قبل كده يعني.

يأتي مسلسل عين سحرية في إطار اجتماعي تشويقي، حول شاب بسيط يعمل فني تركيب كاميرات مراقبة، يتورط في جريمة قتل، قبل أن يقتحم حياته محام غامض، لتتحول العلاقة بينهما إلى ثنائي يكشف ملفات فساد كبرى.

مسلسل عين سحرية بطولة عصام عمر، باسم سمرة، عمرو عبد الجليل، سما إبراهيم، جنا الأشقر، وغيرهم من الفنانين، والعمل من تأليف هشام هلال وإخراج السدير مسعود، وإنتاج المتحدة ستوديوز بالتعاون مع المنتج محمد مشيش.